საქორწინო ხელშეკრულება – რა უნდა იცოდეთ?

სიტუაცია: მარიამი და დავითი დაქორწინებას აპირებენ. მათ სურთ წინასწარ
გაანაწილონ ქონება, რათა მომავალში გაუგებრობები აირიდონ თავიდან.

პასუხი: მეუღლეებს შეუძლიათ დადონ საქორწინო ხელშეკრულება, რომელიც
დაარეგულირებს მათ ქონებრივ ურთიერთობებს ქორწინების პერიოდში და
განქორწინებისას. ხელშეკრულება შესაძლოა შეეხოს როგორც უკვე არსებულ,
ასევე მომავალში შეძენილ ქონებას.

სიტუაცია: ნინო და ლევანი არ არიან დარწმუნებულები როდის უნდა დადონ
ხელშეკრულება - ქორწინებამდე თუ ქორწინების შემდეგ.

პასუხი: ხელშეკრულება შეიძლება დაიდოს ქორწინებამდე ან ქორწინების
შემდეგ ნებისმიერ დროს, თუმცა ძალაში შევა მხოლოდ ქორწინების
რეგისტრაციის მომენტიდან.

სიტუაცია: მეუღლეები შეთანხმდნენ, რომ ქორწინების განმავლობაში შეძენილი
ბინა, რომელიც რეგისტრირებულია ცოლის სახელზე, განქორწინების
შემთხვევაში მხოლოდ მისი ინდივიდუალური ქონება დარჩება, ხოლო გიორგის
სახელზე რეგისტრირებული სახლი - მხოლოდ მისი.

პასუხი: მეუღლეებს შეუძლიათ დადონ საქორწინო ხელშეკრულება, რომელიც
ცვლილებებს განახორციელებს კანონით დადგენილ წესებში - ხელშეკრულებაში
შეიძლება ჩაიწეროს, რომ ბინა და სახლი თითოეულის ინდივიდუალური
საკუთრება დარჩება.

სიტუაცია: მარის სურს, რომ საქორწინო ხელშეკრულებაში ჩაწერილი იყოს, რომ
განქორწინების შემთხვევაში გიორგი ყოველთვიურად 500 დოლარს გადაუხდის
შვილებს 18 წლამდე.

პასუხი: მსგავსი პირობა ვერ ჩაიწერება საქორწინო ხელშეკრულებაში, რადგან
ხელშეკრულებით არ შეიძლება შეიცვალოს მშობლების ვალდებულებები
შვილების მიმართ.

სიტუაცია: ლიზიმ და გიორგიმ დადეს საქორწინო ხელშეკრულება, რომელიც
შეიცავს პირობებს, რომლიც უკიდურესად არახელსაყრელ მდგომარეობაში
აყენებს ლიზის.

პასუხი: ლიზის შეუძლია მიმართოს სასამართლოს. პატივსადები მიზეზების
არსებობისას სასამართლოს შეუძლია შეცვალოს საქორწინო ხელშეკრულების ეს
პირობები.

სიტუაცია: ანიმ და დავითმა საქართველოში დადეს საქორწინო ხელშეკრულება,
თუმცა არ არიან დარწმუნებულნი, რომ ექნება თუ არა ამ ხელშეკრულებას
იურიდიული ძალა სხვა ქვეყნებში?

პასუხი: ზოგიერთი ქვეყნის შემთხვევაში აუცილებელია საქორწინო ხელშეკრულების
აპოსტილირება, ზოგ შემთხვევაში - ლეგალიზაცია, ხოლო ზოგ ქვეყანაში არცერთი
არ არის საჭირო. შესაბამისად, ანისა და დავითის მხრიდან მნიშვნელოვანია
გადაამოწმონ რომელ ქვეყანაში აპირებენ ხელშეკრულების წარდგენას.