ფიზიკური პირების ქონების გადასახადი

2025 წლის 1 ნოემბრამდე, ფიზიკური პირები, რომლებიც 2024 წლის განმავლობაში საკუთრებაში ფლობდნენ უძრავ ქონებას ან/და ავტოსატრანსპორტო საშუალებებს და რომელთა ოჯახის წლიურმა შემოსავალმა 2024 წელს გადააჭარბა 40 000 ლარს, ვალდებულნი არიან წარადგინონ ქონების გადასახადის დეკლარაცია და გადაიხადონ გადასახადი 2025 წლის 15 ნოემბრამდე.

გადასახადის განაკვეთი დამოკიდებულია მესაკუთრის შემოსავალსა და ქონების ადგილმდებარეობაზე და მერყეობს ქონების საბაზრო ღირებულების 0,05%-დან 1%-მდე.
დეკლარაცია წარედგინება პირადი გვერდის (საგადასახადო კაბინეტის) მეშვეობით, რომლის გასააქტიურებლად აუცილებელია საგადასახადო ნომერი, ხოლო გადასახადი იხდება ბიუჯეტის ერთიან ანგარიშზე: 101 001 000.

ახლა კი უფრო ვრცლად კითხვა-პასუხის ფორმატში

ვინ ითვლება უძრავი ქონების მესაკუთრედ

• ფიზიკური პირი, რომლის საკუთრების უფლება უძრავ ნივთზე რეგისტრირებულია საჯარო რეესტრში. მნიშვნელოვანია — გადასახადი ექვემდებარება გადახდას, თუ თქვენ ხართ უძრავი ქონების ობიექტის მესაკუთრე, მათ შორის დაუმთავრებელი მშენებლობის შემთხვევაშიც. თუ თქვენ ხართ მომავალი მესაკუთრე და დეველოპერთან გაფორმებული გაქვთ მხოლოდ ნასყიდობის წინარე ხელშეკრულება, ქონების გადასახადის გადახდა ჯერ ნაადრევია.

ვინ ითვლება სატრანსპორტო საშუალების მესაკუთრედ

• პირი, რომელიც საკუთრებაში ფლობს საქართველოში რეგისტრირებულ სატრანსპორტო საშუალებას. ასეთ სატრანსპორტო საშუალებებს მიეკუთვნება როგორც საქართველოში შეძენილი, ისე უცხოური სატრანსპორტო საშუალებები, რომლებიც საქართველოში იმყოფებიან დროებითი შემოტანის რეჟიმში (დროებითი ქართული სანომრე ნიშნებით).

რომელი ქონება არ იბეგრება გადასახადით

• საქართველოს რეზიდენტისაგან ლიზინგით მიღებული ქონება;
• „ოკუპირებული ტერიტორიების შესახებ“ საქართველოს კანონით დადგენილ ტერიტორიებზე არსებული ქონება — დროებით, კონფლიქტის მოწესრიგებამდე და ეკონომიკური სიტუაციის მოწესრიგებამდე;
• მაღალმთიანი დასახლების საწარმოს (მეწარმის) საკუთრებაში არსებული ქონება, რომელიც მდებარეობს ამავე მაღალმთიანი დასახლების ტერიტორიაზე — შესაბამისი სტატუსის მინიჭებიდან 10 კალენდარული წლის განმავლობაში (სტატუსის მინიჭების კალენდარული წლის ჩათვლით);
• საქართველოს საგადასახადო კოდექსის 206-ე მუხლით გათვალისწინებული ქონების სხვა სახეები.

რა ითვლება ოჯახის შემოსავლად

• მესაკუთრის, მისი მეუღლის, არასრულწლოვანი შვილებისა და გერების, აგრეთვე მესაკუთრესთან მუდმივად მცხოვრები მშობლების, შვილების, გერების, დების, ძმების, ბებიების, პაპების (ბაბუების), შვილიშვილების ერთობლივი შემოსავალი, რომლებიც ეწევიან საერთო მეურნეობას.

რომელი შემოსავალი გაითვალისწინება შემოსავლის განსაზღვრის მიზნით

საქართველოს საგადასახადო კოდექსის 202-ე მუხლის მე-6 ნაწილის შესაბამისად, ქონების გადასახადის მიზნებისათვის, საგადასახადო წლის განმავლობაში ოჯახის მიერ მიღებულ შემოსავლებში აისახება ყველა შემოსავალი, მათ შორის — სარგებელი საგადასახადო შეღავათების გათვალისწინების გარეშე, კერძოდ:

• ეკონომიკური საქმიანობით მიღებული დასაბეგრი შემოსავალი, გარდა მიკრო ბიზნესის სტატუსის მქონე პირის მიერ მიღებული შემოსავლისა;
• ნებისმიერი შემოსავალი, მათ შორის — სარგებელი, რომელიც დაკავშირებული არ არის ეკონომიკურ საქმიანობასთან (მაგალითად: ქონების რეალიზაციით მიღებული ნამეტი, დივიდენდი, სესხის ხელშეკრულებით მიღებული პროცენტი);
• დარიცხული ხელფასი (ანუ მთლიანი ხელფასი (Gross) — გადასახადების დაკავებამდე);
• მცირე ბიზნესის სტატუსის მქონე ინდივიდუალური მეწარმის შემოსავალი — დასაბეგრი შემოსავლის 25%-ის ოდენობით;
• სპეციალური სტატუსის არმქონე ინდივიდუალური მეწარმის შემოსავალი — სრულად.

რომელი შემოსავალი არ გაითვალისწინება შემოსავლის განსაზღვრის მიზნით

საქართველოს საგადასახადო კოდექსის 202-ე მუხლის მე-7 ნაწილის შესაბამისად, შემოსავლებში არ ჩაირთვება (ჩამონათვალი ამომწურავია):

• ოჯახის წევრებისაგან მემკვიდრეობით, ჩუქებით ან განქორწინების საფუძველზე მიღებული ქონების ღირებულება;
• ფიზიკური პირის მიერ საცხოვრებელი სახლის (ბინის) რეალიზაციით მიღებული შემოსავალი (მათ შორის, პირველი რიგის მემკვიდრის მიერ თავისი და მამკვიდრებლის საკუთრების ჯამური ვადა), რომელიც მის საკუთრებაში იყო 2 წელზე მეტი ვადით; (შენიშვნა: თუ იმ ქვეყნის კანონმდებლობით, საგადასახადო პერიოდი უფრო ხანგრძლივია (მაგალითად, 3 ან 5 წელი რუსეთის ფედერაციაში), მოცემულ შემთხვევაში, ქონების 2 წლის შემდეგ გაყიდვიდან მიღებული შემოსავალი არ ჩაირთვება ერთობლივ შემოსავალში);
• საქართველოს საგადასახადო კოდექსის 82-ე მუხლის პირველი ნაწილის „ნ“ ქვეპუნქტით გათვალისწინებული ქონების პირველადი რეალიზაციით მიღებული შემოსავალი; (შენიშვნა: იგულისხმება ქონება, რომელიც კომპენსაციის სახით მიიღეს ლტოლვილის ან ჰუმანიტარული სტატუსის მქონე პირებმა, იძულებით გადაადგილებულმა პირებმა დროებითი საცხოვრებლის სანაცვლოდ პრივატიზების პროგრამის ფარგლებში; აღნიშნული პირებისთვის სახელმწიფოს მიერ გაცემული კომპენსაციები; ამ ქონების პირველადი რეალიზაციით მიღებული შემოსავალი);
• ფიქსირებული გადასახადის გადამხდელისა და მიკრო ბიზნესის სტატუსის მქონე პირის მიერ აღნიშნული ეკონომიკური საქმიანობით მიღებული შემოსავალი;
• საქართველოს საგადასახადო კოდექსის 82-ე მუხლის პირველი ნაწილის „ბ.1“ და „ბ.2“ ქვეპუნქტების შესაბამისად საშემოსავლო გადასახადისაგან გათავისუფლებული შემოსავალი; (შენიშვნა: ბ.1 — სახელმწიფოს მიერ დაფუძნებული არასამეწარმეო (არაკომერციული) იურიდიული პირისგან საქველმოქმედო საქმიანობის ფარგლებში მიღებული შემოსავალი;
• ბ.2 — საქველმოქმედო ორგანიზაციებისგან მკურნალობის ან/და სამედიცინო მომსახურების ხარჯების დასაფინანსებლად მიღებული შემოსავალი);
• დაქირავებულის მიერ დამქირავებლის საკუთრებაში არსებული ავტომობილით პირადი სარგებლობისას მიღებული სარგებელი;
• საქართველოს მოქალაქის მიერ საქართველოს ფარგლებს გარეთ არსებული წყაროდან მიღებული შემოსავალი.

N.B.: იმ შემოსავლების ჩამონათვალი, რომლებიც არ ექვემდებარება აღრიცხვას, ამომწურავია. შესაბამისად, ერთობლივ შემოსავალში უნდა აისახოს: პენსია, დივიდენდი, სესხის პროცენტი, აგრეთვე ისეთი შემოსავლები, რომლებიც პირდაპირ არ არის მითითებული გამონაკლისებში — მატერიალური დახმარება სახელმწიფოსგან და კერძო პირებისგან, საჩუქარი და მემკვიდრეობა (არა ოჯახის წევრისგან), გრანტი, ქონების 2 წლამდე ვადით ფლობისას და ფასიანი ქაღალდების გაყიდვით მიღებული შემოსავალი.


უნდა იქნეს თუ არა გათვალისწინებული უცხოური წყაროდან მიღებული შემოსავალი ქონების გადასახადის მიზნებისთვის

• დიახ, ქონების გადასახადის მიზნებისთვის გაითვალისწინება 2024 წლის განმავლობაში მიღებული მთლიანი შემოსავალი, როგორც საქართველოში არსებული წყაროდან, ისე საზღვარგარეთიდან (გარდა ზემოთ აღნიშნული გამონაკლისებისა). აღნიშნული წესი არ ვრცელდება მხოლოდ საქართველოს მოქალაქეებზე — მათი საზღვარგარეთიდან მიღებული შემოსავალი არ გაითვალისწინება ქონების გადასახადის მიზნებისთვის.

საქართველოს საგადასახადო კოდექსის აღნიშნული დებულება დასტურდება შემოსავლების სამსახურის ინდივიდუალური განმარტებით, რომელიც მიღებულ იქნა ჩვენი მოთხოვნის საფუძველზე. პასუხის ორიგინალს შეგიძლიათ გაეცნოთ აქ.


რა არის ქონების საბაზრო ღირებულება და როგორ განისაზღვრება იგი

• ქონების საბაზრო ღირებულება არის ღირებულება, რომლითაც მოცემული ქონების შეძენა შესაძლებელია თავისუფალ ბაზარზე. საბაზრო ღირებულებას განსაზღვრავს თავად მესაკუთრე და მიუთითებს საგადასახადო დეკლარაციაში. საგადასახადო ორგანო უფლებამოსილია გადახედოს მესაკუთრის მიერ მითითებულ ღირებულებას, თუ იგი აშკარად არ შეესაბამება საბაზრო ღირებულებას. ჩვენ გირჩევთ, შეუკვეთოთ ქონების საბაზრო ღირებულების დამოუკიდებელი შეფასება ან საბაზრო ღირებულების განსაზღვრისას იხელმძღვანელოთ საჯარო წყაროებით (მათ შორის, უძრავი ქონებისა და ავტოსატრანსპორტო საშუალებების გასაყიდი ვებგვერდებით).

რომელი თარიღისთვის განისაზღვრება ქონების საბაზრო ღირებულება

• 2024 წლის 31 დეკემბრის მდგომარეობით.

როგორ არის დამოკიდებული საგადასახადო განაკვეთი მესაკუთრის შემოსავალზე

• იმ ოჯახებისთვის, რომელთა შემოსავალი 100 000 ლარამდეა — საგადასახადო განაკვეთი შეადგენს ქონების საბაზრო ღირებულების 0,05%-დან 0,2%-მდე;
• იმ ოჯახებისთვის, რომელთა შემოსავალი შეადგენს 100 000 ლარს ან მეტს — საგადასახადო განაკვეთი შეადგენს ქონების საბაზრო ღირებულების 0,8%-დან 1%-მდე.

არის თუ არა დამოკიდებული გადასახადის ოდენობა ქონების ფლობის პერიოდზე (თუ მესაკუთრე ქონებას ფლობდა წელიწადზე ნაკლები დროით ან/და 2023 წლის 31 დეკემბრის მდგომარეობით უკვე აღარ იყო მესაკუთრე)

• გადასახადი იანგარიშება საერთო წესით და ირიცხება ქონების ფლობის პერიოდის პროპორციულად. თუ მესაკუთრე 2024 წლის განმავლობაში ქონებას ფლობდა 3 თვის განმავლობაში, გადასახადის თანხა შეადგენს წლიური ოდენობის 1/4-ს.

როგორ წარვადგინოთ დეკლარაცია

• დეკლარაციის წარდგენა შესაძლებელია მხოლოდ ელექტრონულად, პირადი გვერდის (საგადასახადო კაბინეტის) მეშვეობით.

როგორ შევქმნათ/მივიღოთ წვდომა პირად გვერდზე

• პირადი გვერდი აქვს საგადასახადო ნომრის ყველა მფლობელს.

არის თუ არა საჭირო დეკლარაციაზე რაიმე დოკუმენტის დართვა

• არა, დეკლარაციის წარდგენის მომენტში მასზე რაიმე დოკუმენტის დართვა არ ხდება.

რა საფრთხეს შეიცავს დეკლარაციის წარუდგენლობა

• თუ ქონების მესაკუთრე არის უცხოელი პირი, რომელიც არ არის საქართველოს საგადასახადო რეზიდენტი, დეკლარაციის წარუდგენლობის შემთხვევაში საგადასახადო ორგანოს შეუძლია დარიცხოს სავარაუდო ქონების გადასახადი მაქსიმალური განაკვეთით. ამგვარად დარიცხული სავარაუდო გადასახადის გასაჩივრება შესაძლებელია საგადასახადო დეკლარაციისა და შემოსავლის დამადასტურებელი დოკუმენტების (მტკიცებულებების) წარდგენის გზით.

რა სანქციებია გათვალისწინებული გადასახადის ვადაგადაცილებით გადახდისთვის

• საურავი — დროულად გადაუხდელი გადასახადის თანხის 0,05% ყოველ ვადაგადაცილებულ დღეზე;
• თუ ვადაგადაცილების პერიოდი არ აღემატება 2 თვეს — ჯარიმა გადაუხდელი გადასახადის თანხის 5%-ის ოდენობით;
• თუ ვადაგადაცილების პერიოდი აღემატება 2 თვეს — ჯარიმა გადაუხდელი გადასახადის თანხის 10%-ის ოდენობით.