საქართველოს მოქალაქეობის დადგენა - როგორ არის მოწყობილი პროცედურა

საქართველოს მოქალაქეებად აგრეთვე მიიჩნევიან პირები, რომლებსაც არ მიუღიათ სხვა ქვეყნის მოქალაქეობა და არის:

• 1975 წლის 31 მარტამდე დაბადებული პირი, რომელიც საქართველოში ცხოვრობდა ჯამში არანაკლებ 5 წლის განმავლობაში, 1993 წლის 31 მარტისთვის იმყოფებოდა საქართველოს ტერიტორიაზე;

• 1975 წლის 31 მარტის შემდეგ დაბადებული პირი, რომელიც 1993 წლის 31 მარტისთვის ცხოვრობდა საქართველოში;

• საქართველოს ტერიტორიაზე დაბადებული პირი, რომელმაც 1991 წლის 21 დეკემბრის შემდეგ დატოვა საქართველოს ტერიტორია, ამდენად, ვერ აკმაყოფილებს ამ პუნქტის „ა“ და „ბ“ ქვეპუნქტების მოთხოვნებს.

პირი, რომელსაც სურს საქართველოს მოქალაქეობის დადგენის პროცედურა გაიაროს, მიმართავს სახელმწიფო სერვისების განვითარების სააგენტოს ან საზღვარგარეთ არსებულ საქართველოს საკონსულოს და წარმოადგენს შესაბამის განცხადებას. განცხადებასთან ერთად წარმოდგენილი უნდა იქნას ფოტოსურათი 3×4, განმცხადებლის დაბადების მოწმობა და ნებისმიერი სხვა დოკუმენტები, რომლითაც შეიძლება დადასტურებულ იქნას პირის ცხოვრება მუნიციპალიტეტის ტერიტორიაზე კანონით განსაზღვრულ პერიოდში.

მნიშვნელოვანი დოკუმენტი, რომელიც ადგენს პირის მუნიციპალიტეტის ტეიროტრიაზე ცხოვრების პერიოდსა და ფაქტს, არის ცხოვრების ფაქტის დამდგენი მუნიციპალური კომისიის (რომელიც ნებისმიერი მუნიციპალიტეტის აღმასრულებელ ორგანოსთან არსებობს) მიერ გაცემული ცნობა. განმცხადებელს შეუძლია პირადად მიმართოს კომისიას აღნიშნული ცნობის მისაღებად. აგრეთვე, სააგენტო თავადაც არის უფლებამოსილი საკუთარი ინიციატივით მიმართოს კომისიას ცნობის გამოთხოვის მიზნით. პირადი განცხადების საფუძველზე კომისია ცნობას გასცემს 7 დღის ვადაში. სააგენტოს მხრიდან მიმართვის შემთხვევაში ეს ვადა შეიძლება დაირღვეს. 

იუსტიციის სახლში განცხადების განხილვის ვადა დამოკიდებული არის თუ რომელ მუნიციპალიტეტზე მცხოვრებ პირის მიერაა შეტანილი განცხადება:

• აფხაზეთის და ცხინვალის რეგიონში მცხოვრებთათვის - 30 დღე თუ გსურთ პროცედურის უფასოდ გავლა, 20 დღე - 40 ლარის გადახდის შემთხვევაში და 10 ან 15 დღე, თუ შესაბამისად გადახდილი იქნება 100 ან 60 ლარი.
• სხვა მუნიციპალიტეტის მცხოვრებთათვის უფასო განხილვის ვადა შეადგენს 15 დღეს, 5 დღის ვადა 40 ლარი, 3 დღის ვადა - 60 ლარი, იმავე დღეს - 100 ლარი. 0

განცხადების განხილვის შედეგად სააგენტო ამზადებს ორიდან ერთ-ერთ დასკვნას: საქართველოსთან კავშირი დგინდება და განმცხადებელი ითვლება საქართველოს მოქალაქედ, ან საქართველოსთან იურიდიული კავშირი არ დგინდება. სააგენტოს დასკვნა საბოლოოა და მას პრეზიდენტის ბრძანებულება არ მოყვება.

რიგ შემთხვევებში, მაგალითად, სხვა ქვეყნების მოქალაქეობის მოსაპოვებლად, პირს სჭირდება ცნობა იმის თაობაზე, რომ ის არ არის საქართველოს მოქალაქე. უმეტესობა ამისათვის მიმართავს იუსტიციის სახლს და შეცდომით იღებენ ცნობას იმისა თაობაზე რომ არ ფლობენ საქართველოს მოქალაქის აქტიურ დოკუმენტებს - ასეთი ცნობა მათ შემდგომში არ ადგებათ.

იმისათვის, რომ განმცხადებელმა მიიღოს საჭირო დოკუმენტი, სადაც ზუსტად იქნება განსაზღვრული საქართველოს მოქალაქეობის ქონა-არქონა, აუცილებელია მოქალაქეობის დადგენის პროცედურისთვის მიმართვა. იმ შემთხვევაში, თუ დადგინდება განმცხადებლის  საქართველოს მოქალაქეობა, შესაძლებელია საქართველოს მოქალაქეობიდან გასვლა.