You have found yourself in the JUST Advisors blog about the legal life of foreigners in Georgia. ✋ Articles are prepared by experts, but legal information is often relevant as of the publication date. Please pay attention to possible changes in legislation, changes in tariffs of the specified agencies, etc. ✈️ To stay updated and not miss anything: follow us on instagram, facebook, telegram

საქართველოს მოქალაქეობის შენარჩუნება - როდის და როგორ უნდა შევადგინოთ განცხადება?

საქართველოს მხრიდან თანხმობის გარეშე სხვა ქვეყნის მოქალაქეობის მოპოვების შემთხვევაში შესაძლებელია საქართველოს მოქალაქეობის დაკარგვა.
25 ოქტომბერი, 2023
Giorgi Zhuzunashvili, იურისტი JUST Advisors-ში
Nikoloz Gogiashvili, იურისტი JUST Advisors-ში
წინა სტატიებში გიყვებოდით თუ როგორ აღვადგინოთ დაკარგული მოქალაქეობა და გავიაროთ მოქალაქეობის დადგენის პროცედურა. ეს მასალა ასევე გამომდინარეობს „საქართველოს მოქალაქეობის შესახებ“ კანონიდან და ეხება საქართველოს მოქალაქეობის შენარჩუნებას უცხო ქვეყნის მოქალაქეობის მოპოვების შემთხვევაში. ბევრმა არ იცის, რომ ამისათვის  წინასწარ უნდა მიიღოთ საქართველოს მხრიდან თანხმობა.

საქართველოს მოქალაქეობის შენარჩუნების პირობები

ზემოთხსენებული კანონის 211  მუხლის პირველი პუნქტის მიხედვით: „სხვა ქვეყნის მოქალაქეობის მოპოვების შემთხვევაში საქართველოს მოქალაქე შეინარჩუნებს საქართველოს მოქალაქეობას, თუ იგი აღნიშნული ქვეყნის მოქალაქეობის მოპოვებამდე საქართველოს სახელმწიფოდან მიიღებს თანხმობას საქართველოს მოქალაქეობის შენარჩუნებაზე“. აქედან გამომდინარე, თუ მოქალაქე მიიღებს სხვა ქვეყნის მოქალაქეობას საქართველოს პრეზიდენტის თანხმობის გარეშე, ის დაკარგავს საქართველოს მოქალაქეობას.

საქართველოს მოქალაქეობის დაკარგვა მოვლენების ასეთი განვითარებით იშვიათობა არ არის. უმეტესწილად, საქართველოს მოქალაქეებისთვის ცნობილი არ არის, რომ სხვა ქვეყნის მოქალაქეობის მისაღებად საჭირო არის საქართველოს მოქალაქეობის შენარჩუნების პროცედურის გავლა. ხშირად ისეც ხდება, რომ საქართველოს მოქალაქემ არ იცის, რომ საქართველოს მოქალაქეა, საქართველოსთვის კი არ არის ცნობილი რომ მისი მოქალაქე ამავდროულად სხვა ქვეყნის მოქალაქეც არის.

ასეთ შემთხვევებში კანონი იძლევა შესაძლებლობას შენარჩუნების პროცედურა ჩატარდეს უცხო ქვეყნის მოქალაქეობის მიღების შემდეგ. კანონის 322 მუხლის მე-6 პუნქტის თანახმად, საქართველოს იმ მოქალაქეებს, რომლებსაც უცხო ქვეყნის მოქალაქეობის მოპოვების გამო არ შეუწყდათ საქართველოს მოქალაქეობა 2018 წლის 15 აგვისტომდე, უფლება აქვთ 2024 წლის 31 დეკემბრამდე მოითხოვონ საქართველოს მოქალაქეობის შენარჩუნება.

განცხადება დაკმაყოფილდება, თუ პირის კავშირი საქართველოსთან სარწმუნოდ იქნა მიჩნეული (212 მუხლის მე-2 პუნქტი). იმ შემთხვევაში, თუ მოქალაქეობის საკითხთა კომისია გადაწყვეტს, რომ საქართველოსთან კავშირი დაკარგულია ან არასარწმუნოდ იქნა მიჩნეული, განმცხადებელი მიიღებს უარს მოქალაქეობის შენარჩუნებაზე.

მოქალაქეობის შენარჩუნების პროცედურა

მოქალაქეობის შენარჩუნების პროცედურის დასაწყებად საჭიროა სახელმწიფო სერვისების განვითარების სააგენტოსათვის  (იუსტიციის სახლის მეშვეობით)  ან საზღვარგარეთ არსებულ საქართველოს დიპლომატიურ წარმომადგენლობისთვის განცხადებით მიმართვა. დოკუმენტები, რომლებიც საჭიროა:
  • 1
    განცხადება (ნიმუში).
  • 2
    საქართველოს პასპორტი ან ID ბარათი (პირადობის მოწმობა).
  • 3
    დოკუმენტი, რომელიც ადასტურებს უცხო ქვეყნის მოქალაქეობის მიღებას. თუ განმცხადებელს სურს შენარჩუნების პროცედურის დაწყება უცხო ქვეყნის მოქალაქეობის მიღების შემდეგ (კანონის 322 მუხლის მე-6 პუნქტი), მაშინ ასეთი დოკუმენტი შეიძლება იყოს სხვა ქვეყნის საზღვარგარეთის პასპორტი, ხოლო თუ განმცხადებელს სურს უცხო ქვეყნის მოქალაქეობის მოპოვება და საქართველოდან თანხმობის მიღება, ასეთ შემთხვევაში ეს შეიძლება იყოს ცნობა უცხო ქვეყნიდან ან სხვა რომელიმე დოკუმენტი, რომლითაც დასტურდება იმ ქვეყანაში განმცხადებლისთვის მოქალაქეობის მინიჭების პროცედურის მიმდინარეობა.
  • 4
    ფოტო 3x4.
განცხადების ჩაბარების შემდეგ განმცხადებელი იხდის განცხადების განხილვის საფასურს, რომელიც დამოკიდებულია განხილვის ვადაზე (500 ლარი - 80 დღე, 700 ლარი - 60 დღე და 1000 ლარი - 30 დღე). ამ ვადაში განმცხადებელს იბარებენ იუსტიციის სახლში მოქალაქეობის კომისიასთან გასაუბრებისთვის. „მოქალაქეობის საკითხთა კომისიის დადგენილება N2“-ის მე-40 მუხლის მიხედვით, გასაუბრებისას საქართველოსთან განმცხადებლის კავშირის დასადგენად კომისია მათ შორის მხედველობაში იღებს შემდეგ გარემოებებს:
  • 1
    განმცხადებლის ბიოგრაფიული მონაცემები
  • 2
    განმცხადებლის ოჯახის წევრების კავშირი საქართველოსთან
  • 3
    საქართველოში უძრავი ქონების ფლობა
  • 4
     საქართველოში საქმიანობის განხორციელება
თუ განმცხადებელი ვერ აკმაყოფილებს ერთ ან რამდენიმე ზემოთ ჩამოთვლილ პირობას, ეს არ ნიშნავს რომ კომისია აუცილებლად მიიღებს უარყოფით გადაწყვეტილებას. აგრეთვე აღვნიშნავთ, რომ მოქალაქეობის შენარჩუნების განხილვის დროს სააგენტო არ მიმართვას სახელმწიფო უსაფრთხოების სამსახურს განმცხადებლის შესახებ დასკვნის მისაღებად, როგორც ეს ხდება მოქალაქეობის საკითხებთან დაკავშირებულ სხვა შემთხვევებში.

განმცხადებელთან გასაუბრების შემდეგ სააგენტო ამზადებს დასკვნას საქართველოს პრეზიდენტისთვის. დასკვნა ან უარყოფითია, ან დადებითი. აღნიშნული დასკვნის პრეზიდენტის ადმინისტრაციაში მიღებიდან ერთი კვირის ვადაში პრეზიდენტი იღებს საბოლოო გადაწყვეტილებას. თუ განმცხადებელს უარი ეთქვა მოქალაქეობის შენარჩუნებაზე, პრეზიდენტი აგრეთვე იღებს დამატებით გადაწყვეტილებას მოქალაქეობის შეწყვეტის თაობაზე.
ადრე უკვე ვწერდით იმის შესახებ, რომ სააგენტოს დასკვნა ფაქტობრივად განაპირობებს პრეზიდენტის გადაწყვეტილებას - ძალზე იშვიათად ხდება, რომ პრეზიდენტის გადაწყვეტილება სცილდებოდეს დასკვნას. 2022 წელს საქართველოს პრეზიდენტმა გამოსცა 7064 დადებითი გადაწყვეტილება მოქალაქეობის შენარჩუნებაზე.

მოქალაქეობის შენარჩუნება არასრულწლოვნისთვის

კანონით ცალკეა გათვალისწინებული წესი არასრულწლოვნებისათვის მოქალაქეობის შენარჩუნებაზე. საკითხის განხილვისათვის აუცილებელია, რომ არასრულწლოვნის კანონიერმა წარმომადგენელმა მიმართოს სააგენტოს ან საზღვარგარეთ არსებულ საქართველოს წარმომადგენლობას და წარმოადგინოს:
  • 1
    განცხადება
  • 2
    არასრულწლოვნის საქართველოს საზღვარგარეთის პასპორტი ან ID ბარათი (პირადობა)
  • 3
    უცხო ქვეყნის მოქალაქეობის დამდასტურებელი დოკუმენტი
  • 4
    ფოტო 3×4.
  • 5
    მეორე მშობლის თანხმობა არასრულწლოვნისთვის საქართველოს მოქალაქეობის შენარჩუნების თაობაზე
  • 6
    თუ არასრულწლოვანი 14 წელს არის მიღწეული, აგრეთვე მისი თანხმობა
მოქალაქეობის საკითხთა კომისიასთან გასაუბრებას გაივლის ერთ-ერთი მშობელი. გასაუბრების შემდეგ სააგენტო მოამზადებს დასკვნას საქართველოს პრეზიდენტისთვის, რომელიც დასკვნის მიღებიდან ერთ კვირის ვადაში მიიღებს საბოლოო გადაწყვეტილებას.

თუ პრეზიდენტი მიიღებს გადაწყვეტილებას მოქალაქეობის შენარჩუნებაზე უარის თქმის შესახებ, არასრულწლოვანი შეინარჩუნებს საქართველოს მოქალაქეობას 18 წლის მიღწევამდე, რის შემდეგაც მას ავტომატურად შეუწყდება მოქალაქეობა. ვინაიდან 18 წლამდე არასრულწლოვანი ფაქტობრივად ინარჩუნებს მოქალაქეობას უარის მიღების შემთხვევაშიც, ის სარგებლობს საქართველოს მოქალაქის ყველა უფლებით, მათ შორის, საქართველოს მოქალაქის პირადობის მოწმობის და საზღვარგარეთის პასპორტის ფლობის უფლებით.

თუ არასრულწლოვანმა საქართველოს მოქალაქეობასთან ერთად დაბადებით მოიპოვა სხვა ქვეყნის მოქალაქეობაც, 18 წლის მიღწევამდე მან უნდა გაიაროს საქართველოს მოქალაქეობის შენარჩუნების პროცედურა. წინააღმდეგ შემთხვევაში სრულწლოვანების მიღწევისას მას შეუწყდება საქართველოს მოქალაქეობა.
JUST Advisors იურისტები დაგეხმარებიან სწორად მოამზადოთ და ჩააბაროთ განცხადება საქართველოს მოქალაქეობის შენარჩუნებაზე, აღდგენაზე და მიღებაზე. მოვძებნით თქვენთვის ყველაზე ოპტიმალურ ვარიანტს, მაქსიმალურად შევამცირებთ უარის მიღების ალბათობას, მოგამზადებთ ტესტირებისთვის და გასაუბრებისთვის.

მოგეწონათ სტატია? გაგვიზიარე შენი აზრი

გაქვთ შეკითხვა?
მარია გუსეინოვა
კომერციული განყოფილების წამყვანი მენეჯერი
უბრალოდ შეავსეთ ფორმა ქვემოთ მოცემული ღილაკის დახმარებით ან მოგვწერეთ თქვენთვის მოსახერხებელ მესენჯერში: WhatsApp, Telegram