როგორ შეუძლია ინდმეწარმეს საქართველოში ბიზნესით ბინადრობის ნებართვის მოპოვება?

მას შემდეგ, რაც საქართველოში სამეწარმეო საქმიანობით მიღებული შემოსავალი მიაღწევს 50 ათას ლარს, ინდივიდუალურ მეწარმეს შეუძლია განცხადებით მიმართოს ბიზნესით ბინადრობის მიღებაზე. ეს თანხა უნდა გამოიმუშაოთ ბოლო 12 თვის განმავლობაში (არ აგერიოთ კალენდარულ წელთან). თუ თქვენმა ბრუნვამ (შემოსავალი საქონლის რეალიზებით/მომსახურების გაწევით/სამუშაოების შესრულებით) მაგალითად, 4 თვეში მიაღწია მითითებულ თანხას, ლოდინი არაა სჭირო - შეგიძლიათ უკვე მიმართოთ განცხადებით ბინადრობის ნებართვის მისაღებად. შემოსავალი დასტურდება საბანკო ამონაწერით, ან შემოსავლების სამსახურის მიერ გაცემული დოკუმენტებით.

თუ თქვენ, როგორც ინდივიდუალურ მეწარმეს დასაქმებული გყავთ უცხოელები, ბინადრობის ნებართვის მიღებაზე მიმართვისას, 50 ათასი ლარი ბრუნვა უნდა იყოს თითოეულ დასაქმებულ უცხო ქვეყნის მოქალაქეზე (თავად ინდმეწარმის ჩათვლით). ასეთ შემთხვევაში დასაქმებულებსაც შეუძლიათ მიმართონ ბინადრობის ნებართვაზე (ეს ბინადრობის სხვა საფუძველია - დასაქმება ქართულ კომპანიაში)

ბინადრობის ნებართვის მისაღებად განცხადებით მიმართვისას, შემოსავლის მიღების და ქვეყანაში ყოფნის პერიოდი კანონით განსაზღვრული არაა, მაგრამ კანონმდებლისთვის მნიშვნელოვანია ქვეყანაში მუდმივად, ან რეგულარულად ცხოვრების განზრახვის დადასტურება.

ბინადრობის ნებართვის მისაღებად, სახელმწიფო სერვისების განვითარების სააგენტოში განცხადებით მიმართვა (უფლებამოსილი ორგანო, შემდეგში - სააგენტო) და შემდეგი დოკუმენტების წარდგენაა საჭირო:

• პასპორტი;
• შემოსავლის მიღების მტკიცებულება - საბანკო ამონაწერი, ან ცნობა შემოსავლების სამსახურიდან;
• პირადი ქართული საბანკო ანგარიშიდან აღებული ცნობა, რომელიც ადასტურებს საქართველოში საცხოვრებელი სახსრების არსებობას (თანხის ოდენობა შესაძლებელია შეიცვალოს, თუმცა სტატიის გამოქვეყნებისას 2023 წლის დეკემბერში, მინიმალური საორიენტაციო ოდენობა შეადგენს 13 656 ლარს)
• ფოტოსურათი;
• ცნობა დასაქმებულ უცხოელთა რაოდენობის შესახებ;
• მომსახურების საფასურის გადახდის დასტური

განცხადების განხილვის ვადის შესამცირებლად, შესაძლებელია დამატებითი საფასურის გადახდა: 30 დღე - 300 ლარი, 20 დღე - 450 ლარი, 10 დღე - 600ლარი.

სააგენტოში ბინადრობის ნებართვაზე  მიმართვა, საჭიროა საქართველოში კანონიერად ყოფნის ვადის ამოწურვამდე არაუგვიანეს 40 კალენდარული დღით ადრე (ასეთივე წესი მოქმედებს ბინადრობის ნებართვის გაგრძელებაზეც, მაგრამ არის გამონაკლისებიც). აქაც არის ნიუანსები: კანონიერად ყოფნა - უვიზოდ, ვიზით, ბინადრობით, რაც ნიშნავს, რომ თუ ბინადრობის ნებართვის ვადა ამოიწურა უვიზოდ ყოფნის ვადაზე ადრე, ლეგალურად ყოფნის ვადა განისაზღვრება უვიზო რეჟიმის ვადით.

საქართველოში დროებითი ბინადრობის უფლების მინიჭების შესახებ დადებითი გადაწყვეტილების მიღების შემდეგ, განმცხადებელმა უნდა მიმართოს სააგენტოს პირადობის მოწმობის მისაღებად (ბინადრობის მოწმობა). მიმართვას თან უნდა ახლდეს, საქართველოში არსებული უძრავი ქონების მესაკუთრის მისამართზე რეგისტრაციის ნებართვა (თუ განმცხადებელი თავად არ ფლობს უძრავ ქონებას). ბინადრობის მოწმობა გაიცემა მეათე სამუშაო დღეს, მისი ღირებულება 60 ლარია (დამატებითი საფასურის გადახდით შესაძლებელია პროცესის დაჩქარება) და ამით პროცესი შეიძლება ჩაითვალოს დასრულებულად.

პირველადი ბინადრობის ნებართვა გაიცემა 6თვიდან 1 წლამდე ვადით, მომავალში, საფუძვლის არსებობის შემთხვევაში, შესაძლებელია მისი გაგრძელება გაცილებით ხანგრძლივი ვადით: ჩვენს პრაქტიკაში მაქსიმალური პერიოდი 11 წელია!

პირველი მიმართვისგან განსხვავებით, გაგრძელებისას არაა აუცილებელი განმცხადებლის საქართველოს ტერიტორიაზე ყოფნა: მას შეუძლია განცხადება ჩააბაროს დისტანციურად, ან გასცეს მინდობილობა.

ბინადრობის ნებართვის გაცემაზე უარის თქმის საფუძვლები ჩამოთვლილია  „უცხოელთა და მოქალაქეობის არმქონე პირთა სამართლებრივი მდგომარეობის შესახებ“ საქართველოს კანონის მე-18 მუხლში. საფუძველი მრავალია, თუმცა ყველაზე ხშირ ფორმულირებას წარმოადგენს „უფლებამოსილი ორგანოსგან არსებობს დასკვნა, რომ სახელმწიფო ინტერესების ან/და საზოგადოებრივი უსაფრთხოების ინტერესების დაცვის მიზნით საქართველოში ცხოვრება მიზანშეუწონელია“.

უფლებამოსილი ორგანოს დასკვნა (უსაფრთხოების სამსახური) - დოკუმენტი გრიფით „საიდუმლო“. ბინადრობის ნებართვაზე უარის სასამართლო წესით გასაჩივრების შემთხვევაშიც კი, გადაწყვეტილების გაცნობის უფლება აქვს მხოლოდ მოსამართლეს, ადვოკატებს არ აქვთ მასთან წვდომა. იმისათვის, რომ თავი არ ვიმტვრიოთ უარყოფით დასკვნაზე, უმჯობესია მაქსიმალურად მოვემზადოთ და გავითვალისწინოთ ყველა შესაძლო ნიუანსი.

ბინადრობის ნებართვაზე დამოუკიდებლად მიმართვა და ბინადრობის მოწმობის აღება შესაძლებელია, მაგრამ შესაძლებელია იყოს ხარვეზები. თქვენი რესურსების დაზოგვის მიზნით, გამართლებულია მიმართოთ იურისტებს, რომლებსაც აქვთ დამკვიდრებული პრაქტიკა და ინდივიდუალური მიდგომა.

JUST Advisors-ის საიმიგრაციო საკითხების მიმართულებით მომუშავე იურისტები, თავის მარწმუნებლებს, ფაქტობრივად ხელჩაკიდებულები დაყვებიან ბინადრობის ნებართვის მისაღებად გასავლელ გზაზე. აანალიზებენ სიტუაციას, კონსულტაციას უწევენ საჭირო საფუძვლებისა და დოკუმენტაციის თაობაზე, ბინადრობის ნებართვის მისაღებად წარსადგენ „ქეისს“ სულ რაღაც 3 სამუშაო დღეში აწყობენ და პროცესს მიყვებიან განცხადების ჩაბარებიდან, ბინადრობის მოწმობის აღებამდე, მათ შორის მინდობილობით.