გზამკვლევი: საგადასახადო ნომრის აღებიდან ქონების გადასახადის გადახდამდე

კონსულტაცია

გზამკვლევი: საგადასახადო ნომრის აღებიდან ქონების გადასახადის გადახდამდე

ეტაპი 1. საგადასახადო ნომრის აღება

1.1. პირადად ან მინდობილობით აღჭურვილი პირის მეშვეობით (ნოტარიული მინდობილობა) შემოსავლების სამსახურში

თბილისში საგადასახადო მომსახურების ცენტრი მდებარეობს დავით სარაჯიშვილის ქ. №1-ში (იხ. რუკა). შემოსავლების სამსახურის სერვისცენტრების მისამართები საქართველოს ყველა ქალაქში შეგიძლიათ იხილოთ აქ.
საგადასახადო ნომრის ოფლაინ მისაღებად საჭიროა პირადად გამოცხადდეთ შემოსავლების სამსახურში და წარადგინოთ განცხადება, რომელიც ივსება ქართულ ენაზე. მასში მითითებული უნდა იყოს განმცხადებლის პერსონალური მონაცემები, ტელეფონის ნომერი და ელექტრონული ფოსტის მისამართი.
საგადასახადო ნომრის აღების პროცედურა უფასოა, ხოლო ლოდინის დრო შეადგენს მაქსიმუმ ერთ საათს.

პროცედურის დასრულებისას გადმოგეცემათ წერილობითი შეტყობინება ქართულ ენაზე საგადასახადო ნომრის მინიჭების შესახებ. ასევე, რეგისტრაციისას მითითებულ ნომერზე მიიღებთ SMS შეტყობინებას, რომელშიც მითითებული იქნება თქვენი საგადასახადო კაბინეტის (ავტორიზებული გვერდის) მომხმარებლის სახელი და პაროლი.

1.2. დისტანციურად — უცხო ქვეყნის მოქალაქეებს, რომლებიც იმყოფებიან საქართველოს ტერიტორიაზე, შეუძლიათ დარეგისტრირდნენ გადამხდელად ვიდეოზარის მეშვეობით.

ამისათვის საჭიროა:

შეხვიდეთ უწყების ვებგვერდზე და აირჩიოთ მომსახურება „ვიდეოზარი“ (სწრაფი ბმული).
დააჭიროთ ღილაკს ინგლისური წარწერით: „A natural person without Georgian citizenship“.
შეავსოთ მოკლე ანკეტა: მიუთითოთ სახელი და გვარი, საზღვარგარეთის პასპორტის ნომერი, საცხოვრებელი მისამართი საქართველოში და ტელეფონის ნომერი.
დააჭიროთ ღილაკს „Contact the operator“, რათა დაუკავშირდეთ შემოსავლების სამსახურის თანამშრომელს.
ვიდეოზარის მომსახურებით სარგებლობა შესაძლებელია მხოლოდ სამუშაო დღეებში 09:00-დან 18:00 საათამდე. დაგჭირდებათ მომართული ვიდეოკამერა და მიკროფონი. პროცედურა უფასოა.
პროცედურის დასრულებისას თქვენ გექნებათ წერილობითი დასტური საგადასახადო ნომრის მინიჭების შესახებ. ასევე, მიიღებთ SMS შეტყობინებას თქვენი საგადასახადო კაბინეტის მონაცემებით.

ეტაპი 2. საგადასახადო კაბინეტის (ავტორიზებული გვერდის) გააქტიურება

შედით შემოსავლების სამსახურის ვებგვერდზე.
მიუთითეთ მომხმარებლის სახელი და პაროლი, რომლებსაც მიიღებთ SMS-ით საგადასახადო ნომრის აღების შემდეგ.
საგადასახადო კაბინეტის სტატუსი გადაიყვანეთ „არააქტიურ“ რეჟიმში (ამ შემთხვევაში თქვენ არ გეკისრებათ საგადასახადო დეკლარაციების, მათ შორის ნულოვანი დეკლარაციების, წარდგენის ვალდებულება).
ყოველი შემთხვევისთვის გადახედეთ სისტემაში არსებულ სავალდებულო შეტყობინებებს.

ეტაპი 3. ქონების გადასახადის დეკლარაციის შევსება საგადასახადო კაბინეტში და მისი წარდგენა 2025 წლის 1 ნოემბრამდე

შედით საგადასახადო კაბინეტში მომხმარებლის სახელისა და პაროლის გამოყენებით.
აირჩიეთ ქონების გადასახადის დეკლარაცია.
მიუთითეთ გადამხდელის კატეგორია შემოსავლების მიხედვით: 40,000 ლარამდე, 40,000-დან 100,000 ლარამდე, ან 100,000 ლარზე მეტი.
აირჩიეთ, რა სახის დეკლარაციას წარადგენთ (საოჯახო თუ ინდივიდუალური). საოჯახო დეკლარაციის შემთხვევაში მიუთითეთ: მოქალაქეობა, პასპორტის ნომერი, სახელი, გვარი და დაბადების წელი.
თუ ფლობთ მიწას საქართველოს ტერიტორიაზე, მიუთითეთ: მიწის ნაკვეთის ტიპი, მდებარეობა, ფართობი და საგადასახადო შეღავათი (არსებობის შემთხვევაში).
სხვა აქტივებთან დაკავშირებით მიუთითეთ: აქტივის ტიპი, მდებარეობა, საბაზრო ღირებულება ლარში, საგადასახადო შეღავათი (არსებობის შემთხვევაში) და ქონების ფლობის პერიოდი.
საგადასახადო განაკვეთის გამოყენება და გადასახადის დაანგარიშება ხდება ავტომატურად.
დეკლარაციაზე დოკუმენტების თანდართვა საჭირო არ არის.
დააჭირეთ დეკლარაციის გაგზავნის ღილაკს.

ეტაპი 4. გადასახადის თანხის გადახდა 2025 წლის 15 ნოემბრამდე ერთიან სახაზინო ანგარიშზე 101001000.

გადახდა შესაძლებელია საქართველოში მოქმედი ბანკის ანგარიშიდან თანხის გადარიცხვით.
ბანკის სალაროს ან ბანკომატის მეშვეობით.
მესამე პირის სახელით გადახდის შემთხვევაში აუცილებელია მიეთითოს თქვენი საგადასახადო ნომერი.
გაითვალისწინეთ, რომ 15:00 საათის შემდეგ გადარიცხული თანხა საგადასახადო კაბინეტში შესაძლოა აისახოს მომდევნო სამუშაო დღეს.

ეტაპი 5. გადასახადის გადახდის გადამოწმება

ავტორიზაცია გადამხდელის პირად გვერდზე.
შემოწმება, აისახა თუ არა გადახდილი გადასახადის თანხა პირად გვერდზე.
იმ შემთხვევაში, თუ გადახდილი გადასახადის თანხა არ აისახა, პირადი გვერდიდან გაგზავნეთ განცხადება გადახდის თაობაზე და დაურთეთ გადახდის დამადასტურებელი დოკუმენტაცია (მტკიცებულება).